Оюунт Монгол аяны 1 жилийн дүгнэх нийт сурагчдын төлөөлөн манай сургуулийн сурагч хуралд оролцлоо - 14 April 2012 - 45-р дунд сургууль

Эхлэл » » Оюунт Монгол аяны 1 жилийн дүгнэх нийт сурагчдын төлөөлөн манай сургуулийн сурагч хуралд оролцлоо

01:17

Оюунт Монгол аяны 1 жилийн дүгнэх нийт сурагчдын төлөөлөн манай сургуулийн сурагч хуралд оролцлоо

1 жилийн хугацаанд өрнөөд буй Оюунт Монгол аянд манай сургууль маш идэвхтэй сайн оролцож, манай сургуулийн сурагч, Манлайлал номын бүлгэмийн дэд ахлагч Х.Цогтбилгүүндарь Оюунт Монгол аянд хамрагдсан Монголын мянга мянган сурагчдыг төлөөлөн 2012 оны 4 сарын 14нд болсон аяны хуралд оролцон Оюунт Монгол аяныг цааш үргэлжлүүлээсэй хэмээн хүсэж, аяны тухай үзэл бодлоо индрээс хүргэлээ.

Энд хуран цугласан эрхэм хүндэт та бүхэнд - Амар байна уу? гэж амгалан Монгол ёсоор, - Сайн байна уу гэж сайхан монгол ёсоор мэндчилье.

Оюуны сэтгэлгээг идэвхжүүлэн, хөдөлмөрийн хүмүүжлийг ухамсарлуулан, ном судрыг эрхэмлэн, мэдлэг ухааныг орчин үеийн дэвшилтэт технологитой хослуулан эзэмшсэн шинэ үеийн чадварлаг, оюунлаг Монгол бие хүнийг төлөвшүүлэх гэгээлэг их аяныг эхлүүлэн өрнүүлсэн Монголын Психотроникийн хүрээлэн ТББ, UB лавлах 1617 – гийн хамт олонд Монгол улсынхаа мянга, мянган сурагчдын өмнөөс чин сэтгэлийн талархал илэрхийлье.

(...)Энэхүү аян нь олон олон сурагчдыг амьдралын гэгээлэг зорилго зорилт, хүсэл тэмүүлэлтэй болгон, тэдний амжилтын гарааг эхлүүлэн их "хувьслыг” өрнүүлж буй юм. Хүүхэд багачууд, өсвөр үеийнхний ном унших хүсэл сонирхлыг бадрааж, ном судрын үр шим, өгөөжийг таньж мэдүүлэн биднийг эерэг зөв сэтгэлгээтэй, мэдлэг чадварыг эрхэмлэсэн оюунлаг сурагч болгон төлөвшүүлж улмаар хөгжлийн үндэс, түлхүүр болсон хүүхдийн оролцоог бодитой дэмжиж, хүүхдийн оролцоонд хүчтэй, оюунлаг чиглэлийг батжуулан, хүүхдийг хөгжүүлж, тэдний чөлөөт цаг завийг зөв зүйлд зарцуулахад өндөр хувь нэмэр оруулж байгаа юм.

Иймийн учир Монголын мянга мянган сурагчдын төлөөлөн энд зогсож байгаагийн хувьд ОЮУНТ МОНГОЛ хэмээх энэхүү гайхалтай гэгээлэг аяныг цааш үргэлжлүүлэн, илүү их, илүү өргөн хүрээг хамран, бүх дэлхийн сонорт хүргэж, Оюунт Монгол орон маань Оюунт Дэлхийн эхлэл, үндэс нь болно хэмээн бүрэн дүүрэн итгэж хүсэж байна аа.

Өнгөрөгч оны гуравдугаар сарын 11-ний өдөр "Оюунт Монгол"-ын шан татаж байсан "Монголын психотроникийн хүрээлэн", "UB лавлах 1617"-оос санаачлан бямба гаригийг "Оюуны хишиг өдөр" болгосон. Монгол хүний хэл, соёл мөхөн доройтож байгаад зүрх нь "хүчтэй" цохилох болсон хэл бичгийн эрдэмтэд өнгөрөгч "Оюуны хишиг өдөр"-өөр цуглаж "Оюунт Монгол" төслийг дахин хэрэгжүүлэх нь зөв юм гэсэн дүгнэлтэд хүрсэн

Өнөөдөр ном, бүтээл гэхээсээ Оюутолгой, Тавантолгойгоо гэгдэх боллоо. Энэ баялгийг оюунт "толгой", оюунт монгол хүн л зөв хуваарилж чадна. Ингэхийн тулд хүнээ бэлтгэх хэрэгтэй. Аян өрнөснөөр унших, мэдэх сэдэл хүний сэтгэлд төрж байна. Энэ сайн хэрэг. Аяны үр дүн гарч байна. Нийгмийн сэтгэлзүй бидний нүдний өмнө өөрчлөгдөж байна. Улс төрийн нөхцөл байдал бол "Оюунт Монгол"-оос огт өөр юм шүү.

Хүүхэд залуучууд аяныг илүү дэмжиж, бодит үр дүн гарахад чухал үүрэг гүйцэтгэлээ гэдгийг тэд хэллээ. Уулзалтад Монгол Улсын Ардын уран зохиолч, Төрийн соёрхолт, Соёлын гавьяат зутгэлтэн, яруу найрагч Д.Цоодол, Төрийн шагналт, соёлын гавьяат зүтгэлтэн Дармын Батбаяр, Д.Урианхай, Монголын психотроникийн хүрээлэнгийн тэргүүн Д.Төмөртогоо, Төрийн шагналт, Монгол Улсын гавьяат багш, шинжлэх ухааны доктор, профессор Ш.Чоймаа болон бусад хүмүүс оролцлоо.

Энэ үеэр тус төвийн тэргүүн Д.Төмөртогоо "Энэ уулзалтад бүсгүй хүн цөөхөн иржээ. Сайн хүн үйлдвэрлэх хүн бол эхчүүд, ээжүүдийн бүтээж бий болгосон хүнийг боловсролтой болгон хүмүүжүүлэх нь аав нарын үүрэг. Хүн гэгч амьтан газраас ургаж, нарнаас үүсдэггүй. Хүнээс л хүн төрдөг. Тиймээс л бид энэ аяныг хүн рүү чиглүүлж, тэр тусмаа хүүхэд залуус руу түлхүү хандуулж байна.

Таван их дээд сургуульд аян өрнөж, 21 аймгийн номын санд "Оюунт Монгол"-ын бодпого хүрч байна. Хорь гаруй мянган хүн аяныг дэмжиж байгаа сайхан мэдээг дуулгая" гэсэн юм. Оюуны хишиг өдөрт уригдсан зочид энэ үеэр санал бодлоо хэллээ. Энэ үеэр Доктор, профессор С.Дулам "Хүүхдийн бага ангийн боловсролд илүү анхаараасай. Учир нь тэнд монгол хүүхэд өсч байгаа гэдгийг санаасай.

Тиймээс монгол хүүхэд, монгол хүний зан, сэтгэхүйг төлөвшүүлж байгаа бага, дунд ангийн багш нарын цалинг доктор миний цалингаас өндөр болгох нь зүйтэй. Хүүхдийн боловсролд анхаараагүйгээс их, дээд сургуулиуд оюунт монгол бус эрэмдэг сэтгэхүйтнээр дүүрч байна" гэв.

Ийнхүү нэг насны ойгоороо бичиг, соёлын эрдэмтэн, аяныг дэмжигчдээсээ урам авч, санал шүүмжээр нь цаашаа явах жим мөрөө гаргасан "Оюунт Монгол"-ынхон хүүхэд залуусын заавал унших 50 номны жагсаалт гаргаж буйгаа дуулгасан. Уншигч таны уншихыг хүссэн номын нэр ч чухал санал гэдгийг уулзалтын үеэр онцоллоо.